Willemstad - Den fin di siman, New York Post a raportá ku e ‘power couple’, Alex Rodriguez i Jennifer Lopez ya no ta intresá na kumpra New York Mets. New York Mets ta un di dos timnan di beisbòl na New York, ku kua nos Hensley Meulens a firma e aña’ki komo asistente di mènedjer. Segun e korant un di motibunan ku e negosashonnan a pega ta debí na terkedat di e doñonan di New York Mets, ku ta famia Wilpons. Aparentemente e famia no kier a inkluí e kanal di deporte SportsNet New York (SNY) den e dil. E doñonan di Mets ta konvensí di por bende e ekipo di beisbòl lòs for di e kanal di deporte. Sinembargo debí na e situashon di coronavirus i e paro general den deporte, balor di e frankisia a baha, pues kualke intresado den e ekipo lo kier tambe e kanal di televishon aserka. Di otro banda, e bionario Wayne Rothbaum, ku tabata trahando ku JLo i A-Rod, tabata kier a haña e tim na baratio, ademas e tabata ke tin mas kòntròl riba e ekipo. No opstante ku Alex Rodriguez i Jennifer Lopez a bula for di e dil, e saga pa haña un doño nobo pa ekipo di New York Mets ta kontinuá.
Comments