Tin un ‘netwerk’, ku ke pone Minister Suzanne Camelia-Römer un banda.


Tin un ‘netwerk’, ku ta trahando tras di kòrtina pa pone Minister Suzanne Camelia-Römer un banda. Asina e minister a deklará den Parlamentu, dilanti Prokuradó General, durante un reunion pa trata e desaroyonan rondó di hòspital nobo. “Mi no ta bai bisa tur kos ainda, pa mi no stroba trabou di e komishon (‘feitencommissie’) i Prokuradó General, pero ta importante pa menshoná esaki awe”, asina Camelia-Römer a deklará. Segun e minister, e “netwerk” pronto lo presentá un plan pa hal’é un banda. “E ‘netwerk’ aki tin kontaktonan den sirkulonan haltu. Ami no ta un hende ku ta fantasiá, e “netwerk” aki ta eksití di bèrdat i p’esei mi ta atvertí ku nan ke ponemi un banda. Mi salbashon t’é hecho ku mi ta transparente”, Camelia-Römer a sigui splika.

E minister enkargá ku salubridat i hòspital nobo, tabata den Parlamentu pa kontestá varios pregunta relashoná ku e projekto. Te ainda e no a haña sifranan ouditá fo’i 2013 te ku 2016. “Nunka promé m’a topa tantu resistensia den un “dossier”, Camelia-Römer a sigui splika. “Danki Dios ku tantu koalishon komo oposishon ke pa bin klaridat den kaso. No por protehá e ‘netwerk’ aki, pero mester kibr’é”.

Riba e mesun dia ku e minister a bai Parlamentu, SONA a saka diferente propaganda den korantnan lokal pa splika e desaroyonan rondó di hòspital nobo. Entretantu a pidi Algemene Rekenkamer i SOAB pa hasi un investigashon i a forma un komishon independiente ku miembronan apuntá pa koalishon i oposishon, pa yega na klaridat tokante e projekto di hòspital nobo.