Por lo pronto Kòrsou tin gasolin i koriente na e manera kustumbrá.


Durante un rueda di prensa, ku karakter di urgensia, Gobièrnu di Kòrsou a splika ku a aktivá un plan emergensiá, relashoná ku e desaroyonan rondó di PDVSA. No tin motibu direkto pa pániko i por lo pronto Kòrsou por sigui konta riba produktonan manera gasolin, gas, gasoil, koriente i awa, manera kustumbrá

Promé Minister Eugene Rhuggenaath, a reuní den wikènt ku gerensia di Refineria Isla i sindikatonan ku ta representá trahadónan di Isla. Segun Minister Rguggenaath, PDVSA tin atenshon pa e situashon i ku nan lo kumpli ku pago di salario di nan trahadónan, no opstante di e situashon.

Pa medio di un Taskforce di Energia, Gobièrnu ta sigui e situashon kontinuamente i ta tuma akshon segun e diferente senarionan. E Taskforce ta formá pa gerenshanan di diferente organisashon den sektor energétiko, manera Refineria di Kòrsou, Curoil, Aqualectra i di representante di varios organisashon di gobièrnu.

Kaminda ta nesesario, Curoil ta kumpra kombustibel riba merkado internashonal pa por kumpli ku nesesidat di e merkado lokal. Curoil den esaki ta usa su barku ˈRed Majesticˈ pa trese e produktonan Kòrsou i asina ta garantisá ku tin sufisiente produkto, ora ku Refineria Isla eventualmente no por suministrá Kòrsou. Segun direktor di Curoil Yamil Lasten, esaki no nesesariamente lo nifiká ku preis di gasolin lo subi. Sinembargo mester tene kuenta ku e posiblidat aki, despues di e próksimo tres lunanan.

Aqualectra tambe a tuma akshonnan nesesario pa garantisá su servisionan konforme e plan di mitigáshon.

Durante e dianan ku ta sigui, lo informá komunidat tokante di e desaroyonan na momentu ku esaki ta nesesario. Ta úrgi tur hende pa sigui informashonnan verídiko di Gobièrnu i e instanshanan konserní, pa evitá ku informashon robes ta krea preokupashon inesesario.