Piskadónan surnameo a subi laman atrobe, despues di atakenan pirata.


Den fin di siman, piskadónan na Surnam por a subi laman trankil atrobe. Asina Minister di Defensa di e pais a bisa. Minister Ronni Benschop, no a bisa ta kua medida a tuma pa garantisá siguridat riba laman di e piskado surnameo.

Dos siman pasá, piratanan maritimo a ataká di forma brutal, kuater boto di piskadó ku tabatin un tripulashon di 20 hende. Apenas 5 piskadó a sonrebibí e atake. A logra na dera 4 viktima i ainda tin 11 piskadó ku no tin informashon di nan. Mientras tantu tin un investigashon riba posibel sospechosonan guayanes. Den e dianan ku a pasa, ya a presentá 18 sospechoso dilanti di wes komisario. Ministerio Públiko na Surnam, ke mantené e sospechosonan será, te na momentu ku e investigashon kaba. Segun polis, e investigashon ta kana slow, debí ku varios piskadó no ke papia, pa miedu di represaya.

Doñonan di boto na Surnam a reakshoná skèptiko riba e deklarashonnan di e minister. Hopi di e doñonan di boto ta traha ku piskadónan guayanes ilegal i nan tin miedu ku awor lo bini mas kòntròl. E Minister di Hustisia i Polis surnameo a splika ku ta buskando un solushon huntu ku e doñonan di boto. Segun e koperativa di piskadónan, den fin di siman masomenos 50 boto a subi laman atrobe.