ConocoPhilips no a konfiská nada di CITGO Aruba.


Den un komunikado CITGO Aruba a splika ku no konfiská niun propiedat di refineria CITGO Aruba, ni CITGO Petroleum. No opstante ku no a menshoná e nòmber di ConocoPhillips, ta obvio ku e deklarashon ta referi na e kompania. Esaki ta e úniko reakshon kòrtiku ku operador di refineria na Aruba a hasi. Esaki ta pa kita kualkier duda o kontradesí posibel rumor ku e multinashonal merikano ConocoPhillips a konfiská o ke konfiská propiedat na Aruba, manera a sosodé na otro islanan den Karibe.

Den e dianan tras di lomba ConocoPhilips a start e proseso pa konfiská propiedatnan di PVDSA, manera entreotro tankinan di krudo, refineria i otro operashonnan na entreotro Kòrsou, Boneiru, Statia i Aruba.

ConocoPhillips ta purba di kobra PDVSA un debe atrasá. Ta kalkulá ku ta trata di un suma grandi di 33 bion dòler. E problema ta hungando pa 10 aña kaba i awor e kompania ke pone mas preshon riba Venezuela.