Mester bin un plan maestro pa deporte na Kòrsou.


Direktor di FDDK (Fundashon Desaroyo Deporte Kòrsou), Thakai Doran, a indiká ampliamente ku yunan di Kòrsou tin hopi potensial. E direktor ta mustra riba e realidat ku tur e éksito i logronan deportivo ta tuma lugá no opstante di e rekursonan limitá i e skarsedat enorme di personal kualifiká. Ta ku gran esfuerso di e deportistanan mes huntu ku boluntarionan ta logra eksito. Imaginá si nos tabatin guía manera mester ta, kuantu mas mihó resultado nos lo por tabatin, asina Doran a bisa den su diskurso durante e Kongreso riba Deporte na Kòrsou.

Minister di Deporte, Marilyn Alcalá-Wallé, tambe ta wak den e mésun direkshon.

E mandatario ta indiká ku mester bin un ‘Plan Maestro’ pa deporte ku vishon riba siglo 21. Ta tempu pa gobièrnu, sektor privá, lidernan deportivo, dirigentenan i organsisashonnan no gubernamental, pone forsa, talento, eksperensia i esfuersonan huntu, pa asina duna tur yu di Kòrsou, e oportunidat pa desaroyá nan talento lo máksimo.

Minister Alcalá-Wallé a bisa di ta konsiente ku mester bini kambio i adaptashonnan, si nos ke yega na nivelnan mas altu. Tambe mester sostené boluntarionan ku e medionan i formashon nesesario.

E titular di deporte a primintí di lo inkluí e resolushonnan di e Kongreso, den e maneho pa e kuater añanan benidero. Esaki mester resultá den akshonnan konkreto.