Korte Superior a rechasá petishon pa skucha fiskal italiano den kaso ‘Babel’. (VIDEO)


(foto AD) Korte superior a kuminsá ku tratamentu di e kaso kontra lider polítiko i parlamentario pa MFK, Gerrit Schotte i su pareha Cicely vd Dijs. E tres wesnan ku ta atendé e kaso ta wes mr Radder, mr La Maire i mr Lewin. E kaso ku ta karga e nòmber ‘Babel’ ta trata akusashon kontra Schotte i Van der Dijs pa falsifikashon di dokumentu, entrega di denunsia falsu, labamentu di plaka i violashon di lei di komunikashon. E akusadonan a apelá e sentensia diktá den korte di promé instansia. Durante e tratamentu den korte di promé instansia Schotte i Van der Dijs a hasi uzo di nan derechi pa keda ketu (zwijgrecht). Esaki nan a hasi riba konseho di nan anterior abogadonan. Schotte a haña un kondena pa kastigu di 3 aña di prizòn i Van der Dijs a keda sentensiá na 18 luna di prizòn di kual 9 kondishonal. Djaluna último ámbos akusado a opta pa, e biaha akí si, duna nan deklarashonnan. Schotte i Van der Dijs ta representá pa un tim nobo di abogado Geert Jan i Carry Knoops-Hamburger, Anne Baaijes i Marije Vaders. Abogado general Leomar Angela i fiskal Rip a representá Ministerio Públiko.

(video TV Direct)

Defensa E abogadonan a kuminsá nan defensa, alegando ku nan ta haña ku mester deklará Ministerio Públiko no-atmisibel’ (niet ontvankelijk). Por tin diferente motibu pa deklará ministerio públiko no-atmisibel den e veredikto. Según abogado Knoops-Hamburger, Ministerio Públiko a hasi deklarashonnan falsu i mester persiguí abogado general Van der Schans pa perhurio.

(foto Yves Cooper) Perhurio (meineed) ta un akto kastigabel kaminda un persona bou di huramentashon intenshonalmente ta duna un deklarashon falsu, sea por eskrito òf verbal. Van der Schans a traha un prosèsverbal i a bisa bou di huramentashon ku el a risibí un email for di Ministerio Públiko italiano. E akusashon akí según e defensa ta e motibu ku a kuminsá ku e kaso Babel. Esta basá riba e email ku a risibí for di fiskal Roberto Pellicano for di korte italiano. E tim di defensa a bin ku dos testigu for di Italia (Chaira Padovani i Luca Luparia) pa por prueba esaki. Ámbos a deklará di a papia ku fiskal Pellicano. E fiskal italiano a deklará na e testigunan ku no por kòrda di a yega di manda un email pa Kòrsou.

(foto Yves Cooper)

Deklarashon di Schotte. Schotte a bisa di ta lamentá e eskoho robes ku e la hasi den korte di promé instansia, dor di uza su derechi pa keda ketu. Schotte a bolbe bisa di ta inosente. Pa loke ta e fakturanan falsifiká ku a haña riba kòmpiuter di Schotte i tambe den kantor di Corallo na Italia, Schotte a bisa ku nunka el a uza e fakturanan akí. El a atmití sí, di tabatin nan pero no a uza nan. Mas alue Scotte a deklará ku eI a bisa Corallo na sigur kuater okashon, ku e no ta di akuerdo ku e fakturanan, debí ku el a konsiderá ku ta trata di donashon. Gerrit Schotte a splika Korte, ku na 2003, Corallo tabata biba na Sint Maarten. Corallo tabata un hòmber ku influensia rònt mundu i Schotte a pensa di por saka for di dje, kosnan ku por benefisiá Kòrsou. Na 2009 Corallo a konsehá Schotte pa lanta su propio partido. Corallo a yuda den e kampaña di Schotte ku donashonnan di mas ku 210 mil dòler. Tabata risibí sèn riba un kuenta na Merka, kaminda Schotte tabata bula bai i lanta e sèn. Presidente di korte a kuestioná e hecho di kon Schotte por aseptá, siendo Promé Minister, pa sigur na kuater okashon, tuma faktura falsifiká di e negoshi di Van der Dijs i dikon e no a stòp Corallo. Schotte a indiká ku el a hasi esaki pero Corallo a kontinuá tòg. Pa e motibu akí mes, Schotte a stòp di tin kontakto ku Corallo pa un temporada. Cicely van der Dijs di su parti a indiká, ku el a spanta na momentu ku el a tuma nota di e fakturanan riba nòmber di e negoshi di su tata. Korte a kuestioná tambe, dikon no a habri un kuenta akinan. Riba esei Schotte a indiká ku Corallo tabata deseá pa keda anónimo. Di dos dia kaso ‘Babel’. Djarason ta e di dos dia ku lo trata e kaso ‘Babel’. Riba e di dos dia lo pasa riba sobrá akusashonnan kontra e pareha. Lo skucha Schotte riba e denunsia falsu ku el a hasi, di a pèrdè su pasport diplomátiko, ku despues a resultá den klùis di negoshi di Van der Dijs. Despues abogado general Angela i fiskal Rip lo presentá nan rekisitorio pa despues hasi nan demanda. Un rekisitorio ta un relato ku abogado general òf fiskal ta hasi durante tratamentu di un kaso kriminal. E abogado general òf fiskal ta duna su opinion di e hechonan kometé dor di e akusadonan i ta ofresé prueba. Basá riba e ponensia di Ministerio Públiko, ta pidi un demanda. Despues ku abogado general i fiskal hiba palabra, ta turno na e abogadonan di defensa. E tim di defensa di e akusadonan a indiká kaba, di lo bai tuma nan tempu i presentá mas prueba pa supstansiá nan ponensia. Esaki lo por tin komo konsekuensiá ku e kaso lo por dura mas dia ku a premirá.