Mèksiko ta komprometé 5 mion dòler pa konstrukshon di hospital na Dominica.


E gobièrnu di Mèksiko a informá gobièrnu di e isla Dominica, ku e ta komprometé 5 mion dòler merikano (masomenos 13.5 mion dòler di Dominica) pa konstrukshon di Hospital Marigot.

Promé Minister di Dominica, Roosevelt Skerrit i e embahadó mèksikano na Dominica Luis Manuel Moreno, a topa otro na ofisina di e Promé Minister na Roseau. Durante e reunion ta’tei tambe Francine Baron, ku ta minister di asuntunan eksterior i CARICOM dje isla i Dr.John Collin McIntyre, minister di asuntunan di planifikashon, desaroyo ekonómiko i invershon.

Promé minister Skerrit a bisa : “Ta un plaser pa tin bo aki na Dominica i danki pa e interes gubernamental pa ku bienestar di Dominica. Mi ta kere ku pa basta aña nos a krea un bon relashon entre e dos paisnan. Mèksiko a kooperá i kolaborá riba varios tereno. I semper nos por a konfia riba amistat i solidaritat di Mèksiko”.

Mas aleu Skerrit a bisa e embahador mèksikano : “Bo mes personalmente ta un ehèmpel den bo esfuersonan pa hasi e relashon entre Mèksiko i Dominica mas fuerte i mi ta tribi di bisa Mèksiko i Karibe. Nos tin hopi apresio pa e liderasgo di Mèksiko i e pueblo mèksikano i e esfuersonan tantu pa loke ta trata Organisashon di Salú Panamerikano òf Organisashon di Estadonan Merikano. Mèksiko tabata un bon mediador”.

“Despues di tormenta tropikal Erika boso tabata un dje proménan pa yuda nos. Boso a mustra i ekspresá preokupashon i a ofresé yudansa konkreto. Nos sá ku boso ta hasi tur esaki a pesar di boso propio desafíonan interno, pero tòg Mèksiko tin e deseo di brasa paisnan manera Dominica i otronan.” Na aña 1991, Dominica i Mèksiko a establesé relashonnan diplomátiko entre e dos paisnan.