Kompanianan merikano sí lo sigui para tras di akuerdo di Paris.


E kompanianan Apple, Amazon, Facebook i Google a djòin un movementu di sentenar di empresanan merikano ku huntu ta keda sostené e akuerdo klimatológiko di Paris. Microsoft, Twitter, Intel i Spotify tambe ta partisipá.

Nan ta hasi esaki via e kampaña ‘We Are Still In’. E empresanan lo traha huntu ku esnan ku ta traha regla den estado i siudatnan merikano, pa asina pa promé biaha uni forsa i deklará ku nan ta sigui apoyá e akshonnan ku ta kumpli ku e akuerdo di Paris.

Den e akuerdo di Paris tin pará pa baha e emishon di CO2. E subida promedio di temperatura na tera no mag subi mas ku 2 grado Celsius.

E koalishon di kompanianan den un karta riba nan wèpsait a deklará : “E anunsio di e gobièrnu di Trump ta debilitá un sondeo importante den e lucha kontra kambionan klimatológiko i ta daña e posibilidatnan pa mundu evitá efektonan mas peligroso i karu komo resultado di kambionan klimatológiko”.

E presidente merikano Donald Trump a anunsiá ku Estados Unidos lo retirá for di e akuerdo. Djis despues e lidernan di empresanan grandi a reakshoná negativo riba esaki. Direktor di Tesla, Elon Musk, a disidí mesora pa sali for di e konseho di konsulta di Trump, despues di e anunsio. Michael Bloomberg, e alkalde anterior di New York ta esun ku ta guiá e kampaña “We Are Still Inn” .