Hóbennan hulandes ta uza relativamente hopi mas droga kompará ku otro paisnan oropeo. Nan uzo di èkstasi (mdma) i amfetamin entre edatnan di 15 pa 34 aña tabata esun di mas haltu na Oropa den aña 2015.
Pa loke ta trata uzo di kokaina i kanabis, Ulanda ta pará na di dos i di seis lugá. Asina a keda publiká den e relato anual di e Sentro di Opservashon Oropeo pa droga i adikshon na droga (EMCDDA). Ta promé biaha ku a inkorporá rapòrt di kada pais den e relato.
Na Ulanda, un promedio di 6,6 % di hende hòmber i muhé di 15 pa 34 aña a yega di usa èkstasi. Irlanda ta number dos ku 4,4%. Na Hulanda 8,5% tabata hende hòmber. Den uso di amfetamin, e diferensia ku e pais number dos, Estland, tabata grandi. Kasi 3% mas.
E sentro di konosimentu situá na Lissabon a atvertí ku kada bia mas droga nobo, fuerte i sintétiko ta lanta kabes. Aña pasá tabatin 66 diferente tipo.
E kantidat di morto relashoná ku droga tambe ta subi. Na 2015 e kantidat tabata 8.441 den paisnan ku a ser investigá, loke ta mas o ménos 6% mas ku un aña promé. Na Hulanda, e kantidat di morto ta kasi 16 riba kada un mion habitante. Anualmente den merkado di droga na oropeo, mas ku 24 mil mion euro ta drai. Dimitris Avramopoulos, komisario di EU pa Asuntunan Interno a mustra riba e nesesidat pa kombatí krímen organisá i e importansha ku kombatimentu di droga pa salubridat.