Bouterse ta bolbe retirá minister di Hustisia i Polis na Surnam


E minister di Hustisia i di Polis na Sürnam, Eugéne van der San, a ser retirá. Mas o ménos tres luna pasá a nombra Van der San, ku tabata hefe anterior di gabinete di presidente Desi Bouterse. A nombré komo susesor di Jennifer van Dijk-Silos, ku a ser poné un banda dor di e presidente.

E desishon ta sorpresivo, debí ku Van der San tabata ser mirá komo konfidente inkondishonal di presidente Bouterse. Hopi tabata mira den dje e persona ku polis i hustisia lo por pone komo susesor pa Bouterse, den kaso ku lo bin eskalashon durante e proseso penal di 8 di desèmber.

Un resiente aktuashon severo di e unidat mobil kontra e demostrantenan, riba 18 di aprel último, ta ser mirá komo un señal di e maneho ‘no nonsense’ di Van der San.

Sinembargo e relashon entre Bouterse i su hefe di gabinete anterior tabata ménos bon ku hopi hende a pensa. Asina a bin dilanti durante un rueda di prensa. Durante un transmishon bibu, Van der Sande a keha riba e informashon defisiente ku el a haña relashoná e maneho ku e mester a hiba. El a kulpa Melvin Linscheer, direktor di Seguridat Nashonal, di a duna informashon na e lider di oposishon Chan Santokhi, ku ta ser mirá komo enemigu. Van der San a bisa mas aleu ku for di su promé dia komo minister el a sintié infelis i ku no tabata enbolbié den asuntunan importante.

Presidente di parlamentu tambe mester a hala atenshon di Van der San debí ku el a yama miembronan di oposishon ladronnan di baka i kabritu, durante un reunion di Asamblea Nashonal. Despues di e rueda di prensa e posishon di e minister a bira insoportabel. Oposishon te hasta a yam’é un peliger pa Sürnam i a urgi su retiro inmediato. Un dia despues esaki a sosodé. Durante un kombersashon kòrtiku presidente Bouterse a pidi Van der San pa e entregá su kartera, loke el a hasi tambe. Bouterse a haña ku e remarkenan di Van der San no tabatin un base di bèrdat. No ta konosí ken lo bira e susesor di e minister.