
Djabièrnè e komishon di Parlamento Ulandes ku ta investigá froude ku impuesto a skucha e empresario yu di Kòrsou, Gregory Elias. Durante e seshon ku a tuma lugá den Tweede Kamer na Ulanda, nan no a logra saka mashá informashon nobo for di Elias, asina Caribisch Netwerk a raportá. Segun NOS, Gregory Elias a ninga tur akusashon ku e ta yuda hendenan riku na U;anda pa evadí impuesto. Durante e seshon, e diskushon a trata hopi tèrminológianan tekniko relashoná ku impuesto. Gregory Elias su ‘trustkantoor’ na Kòrsou ta un sorto di kompania atministrativo ku ta manehá bv, cv, i fundashonnan ku ta keda konstruí den kuadro di impuesto. Meta di e seshon tabata pa e komishon haña un mihó bista riba transparensha di konstrukshonnan fiskal i e ròl ku kantornan di ‘trust’ ta hunga den tipo di konstrukshonnan asina. Tur esaki a surgi debí na e famoso kaso di Panamá Papers, kaminda a sali na kla kon hendenan riku ta skonde sèn pa impuesto. Di e manera ei hopi pais na mundu a pèrdè miones na impuesto. Durante e entrevista, Elias a skohé su kontestanan ku masha koutela i bon pensá, asina e komishon a konstatá. Den su kontestanan, Elias a keda enfatisá ku su kompania a aktua según e leinan vigente na Kòrsou. Den Panamá Paper ta hasi menshon di e multimionario na 312 okashon i su kantor ta nombrá 1200 biaha, asina NOS ta relatá. Ora ku e komishon a puntr’é tokante di e 312 menshonnan den Panamá Papers relashoná ku e kompania panameño Mossack Fonseca, Elias a reakshoná un poko iritá, segun Caribisch Netwerk. E kompania panameño tabata yuda su klientenan riku pa skonde pa skonde sèn di impuesto. Elias a bisa : “Esei no ta bèrdat i mi ke koregí e informashon. Mi kompania tin tres kliente, di kua nos a traha pa nan ku Mossack Fonseca.”

Komishon Tweede Kamer : Van Dam (CDA), Leijten (SP), Bruins (ChristenUnie), presidente Nijboer (PvdA), Van der Lee (GroenLinks) i Paternotte (D66) Den un reakshon riba ponensia di un di e miembronan dje komishon Chris van Dam (CDA), tokante hendenan ku ke warda nan sèn na Kòrsou pa evita di paga hopi impuesto na Ulanda, Elias a kontesta : “Si e konsehero finansiero bisa pa warda bo sèn na Kòrsou den un konstrukshon legal i tur kos kana nèchi según lei, ami no ta mira e problema. Lei ta pèrmití esei”. A pidi Elias pa duna su deklarashonnan bou di huramentashon den Tweede Kamer na Ulanda i e no por a ninga di partisipá na e seshon. Pa e miembro di Tweede Kamer, Andre Bosman (VVD), e kos ta konfuso. Según Bosnam, Elias ta bisa ku e ta kumpli ku leí i e no a tende e komishon ku a interogé bisa ku no ta asina. Según Bosman : “Nos no ta kere ku un komishon asina por atendé e problema i esei tabata bisto durante e entrvista. Elias por a sinta trankil nan dilanti i bisa ku e ta kumpli ku lei. Si ke hasi algu, mester kambia lei”.