Béisbòl na Kòrsou a haña un presidente nobo den persona di Micheline Heyliger. Esaki ta promé biaha ku e Federashon di Béisbòl Kòrsou (FEBEKO) tin un presidente femenino. Durante un reunion general a skohe e presidente nobo, ku tabata e úniko kandidato ku a postulá su mes pa e puesto. Béisbòl lokal no ta den su mihó tempu, komo tal lo tin hopi trabou pa e direktiva nobo. E aktual presidente Armin Konket a bai okupá un puesto komo minister den e gabinete nobo i konsekuentemente no por a sigui ku e tareanan komo presidente di e federashon. Durante e último añanan e interes di públiko na Kòrsou pa bai wak wega, a baha enorme. Ta spera ku awor ku Micheline Heyliger a tuma mando di e federashon lo bin un kambio pa ku beisbòl na Kòrsou. Micheline Heyliger ta mama di e pelotero profeshonal Yurendell DeCaster i un amante grandi di e deporte. Otro persona ku tambe a mustra interes pa un puesto den direktiva ta Vurney Jansen, ku ta ruman di e picher profeshonal pa LA Dodgers, Kenley Jansen.