James Comey, èks direktor di FBI, a uza un amigu di dje pa lèk dokumentonan ku informashon riba su kòmbersashonnan personal ku presidente Trump. Di e manera ei e kier a logra un investigadó spesial pa e kaso relashoná ku e konsehero di presidente Trump, Michael Flynn. Asina Comey a deklará dilanti un komishon di Senado merikano. Luna pasá gobièrnu di Trump a apuntá, otro èks direktor di FBI, Robert Mueller komo investigado spesial. E amigu di Comey, Daniel Richman, ku ta traha na e fakultat di lei, na Columbia University, a atmití ku ta e a lèk e dokumentonan na prensa. Segun Comey den su deklarashon, el a kuminsá registrá e kòmbersashonnan ku presidente Trump, debí ku e tabatin miedu ku e presidente lo a gaña tokante loke nan a papia. “P’esei m’a kuminsá registrá detayadamente loke nos tabata papia i kon esaki tabata sosodé”, Comey a sigui splika Senado. Riba e pregunta si el a registrá e kombersashonnan pa miedu ku e mes lo a ser husgá, Comey a bisa : “Bou di presidente Bush i Obama, nunka mi no a sinti miedu, pero aworaki sí mi a sinti e nesesidat pa mantené un memo riba loke nos tabata papia”. Comey a deklará ku nunka presidente Trump no a pidi’é pa para e investigashon relashoná ku metementu di Rusia den elekshon na Merka. Den un reakshon despues di e deklarashonnan di Comey, Kas Blanku a splika ku presidente Trump no ta un gañadó.