Minister di Hustisia Girigorie ke sera kosta di Kòrsou pa venezolanonan ilegal.


Konseho di minister a disidí siman pasá ku lo sera kostanan, pa trata na kontené e fluho di venezolanonan ku ta yega Kòrsou. Asina minister di hustisia Quincy Girigorie (PAR) a deklará na AD.

Siman pasá outoridatnan a detené 51 venezolano ku a purba drenta Kòrsou di forma ilegal. Den e siman promé ku esei a detené 29 persona na altura di Klein Kòrsou, entre kuá tambe dos mucha.

No opstante ku te ku resien vise-promé minister Ribeiro a splika ku no ta trata di un situashon alarmante, tòg e situashon ta mas serio ku a kalkulá. Según e korant ulandes NRC, tin entre 5 pa 10-mil venezolano ilegal na Kòrsou.

“E problema ta kresiente i tin tur atenshon di gobièrnu”, asina e minister di Hustisia nobo a deklará. A instalá un komishon ku ta konsistí di entre otro ministernan di Hustisia, di Asuntunan General, di Salubridat, Medio Ambiente i Naturalesa i minister di Asuntunan Sosial. A inkluí minister dì Asuntunan General debí ku no ta trata solamente di un problema di Kòrsou, pero tambe di reino. E komishon lo analisá diferente aspekto di situashon ku a surgi, entre otro e parti represivo.

E minister no a duna muchu detaye kon lo sera kostanan, pero a indiká ku tin vários alternativa i ku koordinando un ke otro ku warda kosta. E idea tá pa vigilá e kostanan 24 ora pa dia.