Kapasidat pa produsí energia alternativo a oumentá mundialmente ku 9%.


E kapasidat di energia alternativo a subi mundialmente ku 9% ku ta representá 161 gigawatt pa yega na un total di 2017 gigawatt. Según sifranan di e plataforma energétiko REN21, esaki ta un oumento rèkòrt. Den e plataforma tin representashon di diferente organisashon manera Banko Mundial, Komishon Oropeo i Green Peace.

E plataforma no a duna di konosé kiko ta porsentahe ku energia alternativo ta representá den e totalidat energétiko mundial. Sí nan a splika ku energia alternativo ta sòru 20 te 30 porshento di e konsumo energétiko di paisnan manera Portugal i Irlandia.

Según e investigashon, kasi mitar di e konsumo ta debí na energia solar, mientras ku energia di bientu ta sòru pa un tèrsera parti di e totalidat. Mundialmente ya tin sufisiente produkshon di energia alternativo pa suministrá hinter wèst Oropa.

E gastunan di energia alternativo tambe ta bahando rapidamente. Ya e preis pa produkshon di energia den paisnan manera Chile, India i Arabia Saudita a baha bou di tres dòler pa ‘kilowattuur’. Produkshon di energia fosil ta kosta entre tres pa ocho dòler pa ‘kilowattuur’. Ta remarkabel sinembargo ku invershonnan den energia alternativo a baha ku 23% kompará ku 2015, mientras ku e demanda a oumentá. Esaki ta debí ku e gastunan pa invershon tambe a baha.

Aki dies pa binti aña, e preis pa produkshon di energia solar lo baha, den sierto areanan, te bou di un dòler sèn pa ‘kilowattuur’. Asina Wim Sinke, ku ta profesor den energia solar na Universidat di Amsterdam a splika.

E kantidat di kuponan di trabou den e sektor di energia alternativo tambe ta krese rapidamente. Den 2015 a registrá 8.3 mion kupo di trabou den e sektor, mientras ku na 2016 ya e kantidat a yega 9.8 mion.