Preparashonnan pa Karnaval 2018 ta kanando i ya ta papiando riba potensial organisadónan di e magno fiesta kultural, asina korant Vigilante ta indiká. Corine Djaoen Genaro ta entre esnan ku su nòmber ta riba mesa komo potensial organisadó. Aparte di Corine, Hubert ‘Juni’ Aniceta i Lisette Jansen tambe ta menshoná. Corine ya den pasado a organisá e gran fiesta na satisfakshon di hopi. ‘Juni’ Aniceta no ta deskonosí den e mundu kultural i na vários okashon Aniceta a proba di por organisá eventonan grandi i na nivel. E aña akí mes ‘Juni’ tabata enkargá ku organisashon di diferente sertamen durante e periodo di Karnaval. Lisette Jansen ta oriyundo di Banda ‘Bou. E aña akí, Lisette tabata enkargá ku organisashon di Karnaval na Banda ‘Bou i a logra hasi un tremendo trabou. Banda ‘Bou tabatin hasta su mes festival di tumba, bou di liderasgo di Jansen. Desishon final riba ken lo organisá Karnaval 2018 ta den mas di gobièrnu. Karnaval ta kai den e kartera di minister Alcala-Walle (PAR), ku ta enkargá ku Enseñansa i Kultura. Apertura di Karnaval 2018 ta programá pa djasabra 6 di yanüari, mientras ku Gran Marcha lo tuma lugá djadumingu 11 di febrüari.