Enseñansa na Barbados a haña un donashon di mas ku10 mion dòler di Barbados (US$ 5 mion) for di China, pa kumpra material nobo. Lo repartí e materialnan na skol i institutonan rònt e isla.
Ronald Jones, minister di enseñansa, siensia, teknologia i inovashon a akseptá e donashon serka embahador di China na Barbados, Wang Ke.
Durante un seremonia a formalisá e donashon chines i Jones a djòin e promé minister Freundel Stuart i empleadonan públiko di e ministerio di enseñansa pa gradisí China. E minister di enseñansa Jones a remarká ku Barbados tin un relashon largu i kordial ku gobièrnu di China i su hendenan. E donashon ta un manifestashon di e bon relashon ku tabata eksistí entre e dos paisnan, e minister a enfatisá.
El a deklará ku ya su ministerio a kuminsá ku distribushon di e materialnan. E donashon ta kubri 3000 desktop ku monitòr grandi, 2000 laptop i 9000 tablet. E 14000 piesanan di teknologia lo keda distribuí na tur skol públiko i privá ku ta kai bou di “Education Act”.
Jones a deklará ku kasi tur institushon asosiá ku enseñansa, siensia, teknologia i inovashon lo haña un parti di e donashon, inkluso 2500 stul i 2500 lèsenar.