Instagram ta e ret sosial ku e influensha mas malu riba hóbennan.


Instagram tin e influensha mas malu riba salú mental di hóbennan. Esaki ta konklushon di investigadónan britániko, despues di a kuestioná 1479 hóben entre 14 i 24 aña.

Instagram tin un influensha negativo riba e imágen korporal i e kalidat di soño di hóbennan i ta kondusí na ansha pa pèrde algu. Di otro banda, e aspekto positivo ta ku e medio stimulá outoekspreshon i identidat.

A puntra partisipantenan ki influensha e plataformanan di ret sosial tin riba kosnan manera ansha, soledat i partisipashon sosial. YouTube a sali na promé lugá komo medio ku influensia mas positivo, siguí pa Twitter. Facebook i Snapchat a sali na di tres i di kuater lugá.

Royal Society for Public Health (RSPH) a trese dilanti ku ounke e plataformanan tin komo propósito pa konektá hóbennan ku otro, serka algun e ta aktivá problemanan di salú mental.

RSPH ta konsehá pa hasi uso di ‘pop-ups’ pa wèpsaitnan manera Twitter i Facebook, ku ta atvertí ora na momentu di uso frekuente.

“Ta interesante pa mira ku Instagram i Snapchat ta esnan ku ta skor mas malu pa loke ta nan influensia riba hoben”, asina Shirley Cramers di RSPH ta deklará den The Telegraph. “Tur dos plataforma ta prinsipalmente dirigí riba imágen i ta parse ku nan ta lanta sintimentunan di ansha i ignoransha”.