Riba petishon di e propio gobièrnu, IMF a stòp yudansa na Surnam.


Fondo Monetario Internashonal (IMF) a stòp yudansa finansiero na Surnam. Esaki riba petishon di Surnam mes, asina un bosero di e institushon finansiero a konfirmá na ANP.

Den Parlamento na Surnam, Minister di Finansas Gillmore Hoefdraag a splika ku no tin mester mas di yudansa pa e balansa di pago. Segun e minister, situashon finansiero di su pais ta mas mihó ku aprel aña pasá. Den e tempu ei Surnam i IMF a yega na un akuerdo pa un liña di krédito di emergensia di 425 mion euro. Di e montante ei, solamente e promé parti, ku tabata un suma di 80 mion euro, a keda transferí den yüni di aña pasá.

Despues di e promé transakshon e relashon entre Surnam i IMF a empeorá. E gobièrnu di presidente Desi Bouterse a nenga di ahustá supsidio riba kombustibel, elektrisidat i awa manera IMF a eksigí. Según Bouterse e pueblo no por karga ku e subida di preisnan. Pa IMF esaki tabata motibu pa no hasi un di dos pago na Surnam.

Entretantu e minister di Finansa di Surnam a rekoudá 550 mion dòler riba merkado di kapital via di bono. El a fia sèn tambe serka otro organisashonnan internashonal manera Banko di desaroyo inter-amerikano i islamítiko. El a haña hopi krítika pa akshon akí, debí ku e sumanan di interes ku Surnam tin ku paga bèk, lo horka e siguiente generashon na Surnam.

Ekonomia di e pais ta bou di preshon pisá debí na e bahada enorme di preis di petróleo i oro, pero tambe debí na mal maneho finansiero, segun ekspertonan. Dor di esei e posishon finansiero di e país a haña un buraku i ekonomia a kai den reseshon.