Djadumingu 26 di febrüari durante di marcha di karnaval grandi, polis a detené un hòmber pa posishon di droga i tres otro sospechoso pa insulto i agreshon/maltrato. Despues di e detenshonnan algun persona a post un grabashon riba Facebook ku tabata reflehá solamente e parti di aktuashon di polis durante e insidente, sin e parti ku a kondusí na aktuashon polisial. Esaki a trese kuné ku algun persona a haña ta bon pa insultá i menasá algun agente polisial spesífiko i kuerpo polisial en general riba Facebook. Ademas nan tabata instigá e públiko kontra di polis. Menasa hopi serio a keda publiká via e medio sosial aki.
Na momento ku a informá mando polisial di esaki, mesora a tuma kontakto ku Ministerio Públiko i a kuminsá un investigashon profundo den e kaso. Diferente departamento spesialisá di kuerpo polisial bou di guia di Ministerio públiko a logra identifiká e sospechosonan ku a publiká e menasanan riba Facebook.
Fiskal di Ministerio Públiko a duna pèrmit di aresto di e sospechosonan. En konekshon ku esaki, djamars 28 di febrüari 2017 tim di aresto a detené e promé dos sospechosonan:
1. e hòmber M.C.T. nasé na Kòrsou, 44 aña di edat. E detenshon a tuma lugá alrededor di 2.10or riba brùg di ponton
2. e hòmber R.A.M. nasé na Kòrsou, 34 aña di edat. E detenshon a tuma lugá alrededor di 6.15or riba Kaya Thomas Henriquez na Brievengat.
A presentá e sospechosonan dilanti un fiskal (ouksiliar) ku a ordená nan enkarselamentu pendiente di mas investigashon.