Hoben di 18 aña asesiná despues di Tiner Parade.

Djasabra 25 di febrüari 2017 alrededor di 01.50or di mardugá, Sentral di Polis a dirigí un unidat na altura di brùg di ponton na e banda di Punda pa un kaso di tiramentu.
Na e sitio polis a topa un homber drumi abou ku algun herida di bala na e parti ariba di su kurpa. E viktima a keda identifiká komo D’xiane Yoshua Mardechelo Ogenia, nasé na Kòrsou 19 sèptèmber 1998.

For di investigashon preliminar ku polis a realisá na e sitio a sali na kla ku probablemente e hòmber víktima tabatin un diskushon ku un grupo di persona.
Na dado momentu un di nan a saka un arma di kandela i lòs tiru dirigí riba e víktima ku konsekuensia ku algun di e tirunan a alkans’é na e parti ariba di su kurpa. E víktima a fayesé na sitio dje insidente mes. Despues di e akto e sospechosonan a kore bai.

Dòkter a konstatá morto di e hòmber aki i riba òrdu di Fiskal di Ministerio Públiko a konfiská su kurpa.
 E investigashon den e kaso ta kontinuá.
 Polis ta supliká tur persona ku por tin informashon tokante di e kaso, pa tuma kontakto ku polis na 917 of e liña anonimo 108.