Den un kaso lamentabel ku a tuma lugá algu despues di mèrdia, Parlamentario Jacintha Constancia (MFK) a agredí Parlamentario Giselle McWilliam (MAN) dor di dal esaki un wanta den sala di Parlamento. Durante su disertashon den e reunion, Constancia a referí na un kaso kaminda un famia di McWilliam a haña un trabou pa pone e “dranghek-nan” pa Karnaval 2017. Den un reakshon, Giselle McWilliam na su turno a papia ampliamente riba e kaso di “mondkapjes” pa kuá Constancia a keda detené den pasado. Na momentu ku Parlamentario Gassan Dannawi tabata bai kuminsá su presentashon, Jacintha i su demas koleganan a kuminsá drenta Parlamento i mientras ku e otronan a sigui kana, Constancia a kita bai riba Giselle i a pasa esaki un wanta. A surgi un desorden kompletu den Parlamento entre e diferente miembronan. Presidente di Parlamento a skòrs e reunion, mientras ku miembronan di kuerpo polisial a kuminsá drenta sala, pa kontrolá e situashon. Algun ratu despues Giselle McWilliam a entregá un keho pa agreshon na warda di polis den Punda. Jacintha Constancia na su tur a bai warda kompañá pa polis i a keda detené.
Riba ordu di Fiskal di Ministerio Publiko a laga enkarselá Jacintha Constancia i el a drenta su periodo di enkarselashon preventivo (in verzekeringstelling) debí na e denunsia di menasa i maltrato. Enkarselashon preventivo ta un proseso konforme Kodigo di Prosedimiento Penal (Wetboek van Strafvordering) ku ta dura 2 x 24 ora máksimo pa asina Landsrecherche Korsou por kontinua ku nan investigashon.
Den un komunikado partido MFK a pidi diskulpa públikamente na Parlamentario Giselle McWilliam i a kondená e akto di nan miembro Jacintha Constancia. Parlamentario Constancia den un promé reakshon na prensa djis despues di e suseso a indiká ku e lo distansiá su mes for di Parlamento i mientras tantu tin indikashon kaba ku Amerigo Thode lo remplasá Jacintha Constancia ku miembro den Parlamento pa MFK.