(foto VIGILANTE)
Djamars 21 di febrüari 2017, alrededor di 06.45 or, Sentral di polis a dirigí un patruya na Caracasbaaiweg pa un aksidente entre un outo i un motosaikel.Na yegada di e patruya nan a bin topa un hòmber drumi abou ku un kap na su kabes i tabata sangra bastante.
For di un investigashon preliminar ku polis a hasi na e sitio, a sali na kla ku shofùr di un outo ku tabata kore riba Caracasbaaiweg den direkshon di Saliña, a bai lora na su man robes na altura di e krusada ku Sòrsaka. Nèt na momentu ei e shofur di e motosaikel a trata di pasa e outo na man robes. Dor di akshon aki e motosaikel a bai dal den parti dilanti di e outo i shofùr di e motosaikel a pèrdè kontrol riba e vehíkulo i a dal su kabes kontra di un ‘vangrail’.
Alrededor di mitar di nuebe, dòkter di polis a konstatá morto di e motosiklista, e hòmber Noah Daniel Guy Desjardins nasé na Canada 24 di desèmber 1989.Departamento di Tráfiko ta kontinuá ku e investigashon.