Ecuador ta bai di dos buèlta den elekshon presidensial.


Na Ecuador mester di un di dos buèlta pa yega na un presidente nobo. Niun dje kandidatonan den kontienda no a haña e 50% di votonan nesesario. E kandidato iskierdista Lenin Moreno tabatin kasi 40%, mientras ku 30% a vota pa e kandidato konservativo Guillermo Lasso. Nan dos lo kompetí den e di dos buèlta riba 2 di aprel.

E èks-presidente Moreno ta miembro di e mesun partido di e aktual presidente Rafael Correa. Den e dies añanan ku e tabata presidente el a usa entradanan di petroli pa modernisá Ecuador drástikamente i pa subi e nivel di bida di famianan pober. El a goberná ku man duru i a restringí prensa krítiko. Correa no a pone su mes reeligibel.

Durante e kampaña elektoral Lasso a anunsiá ku e lo kibra ku e rumbo di Correa. E ke baha entre otro impuesto i krea un mion di empleo nobo. Lasso a selebrá su pasashi pa e di dos buèlta manera un viktoria. “Mi ta saka mi man pa brasa tur ekuatoriano ku ta soña ku un kambio,” asina e bankero a bisa su fanátikonan.

E resultado di e elekshon presidensial por tin konsekuensia tambe pa Julian Assange, ku ta fundadó di WikiLeaks. Assange ta den embahada ekuatoriano na Londres for di 2012, pa evitá ku lo ekstradité pa Suesia. Lasso a anunsiá ku ora e bira presidente e lo stòp e protekshon di Assange mesora.