Ulandesnan tin 340 mil mion euro na sèn di spar serka bankonan.


Habitantenan di Hulanda tabatin na fin di 2016 masomenos 340 mil mion euro na sèn di spar na banko. Den un aña e kantidat di sèn di spar a subi ku 5.3 mil mion euro. 1.8 mil mion ta sèn ku a keda depositá na banko. Sobrá 3.5 mil mion ta konsistí di interes ku a haña, segun sifranan di ‘De Nederlandse Bank’ (DNB).

Ku kasi 17 mion di habitante esei ta nifiká masomenos 19.900 euro na sèn di spar pa kada hulandes. DNB no ta bisa nada di e repartishon real entre e gruponan di e poblashon. E parti mas grandi di e sèn di spar ta depositá na un kantidatnan relativamente chikí di banko. Pero e último añanan e konsentrashon pa loke ta merkado di spar a baha un tiki. Na 2012, 91% di e sèn tabata na e bankonan di mas grandi, awor esaki ta 87 porshento. Segun DNB despues di e bankarota di Icesave na 2008 i di DSB na 2009, e konsentrashon riba merkado di spar a krese. E tempu ei hulandesnan tabata konfia nan sèn serka bankonan grandi. Awor mas sèn ta bai na bankonan mas chikí. E motibu prinsipal ta ku hopi biaha nan ta ofresé un interes di spar un tiki mas haltu ku bankonan grandi. Na fin di 2016 bankonan grandi tabata duna masomenos 0.4 porshento na interes i bankonan chikí 0.85 porshento. Ademas tin bankonan stranhero aktivo na Hulanda, pero pa motibu di e frakaso di Icesave nan tin un parti chikitu den e merkado. Solamente 2 porshento di e sèn di spar ta depositá serka bankonan ku tin un kompania mama stranhero.