Segun presidente di Konseho Supremo Elektoral (KSE), Raymond “Pacheco” Römer e promé reunion pa prepará elekshon pa dia 28 di aprel awor, a tuma lugá. KSE a risibí e “landsbesluit” ofisial firmá dor di gobernador Lucille George-Wout ku ta bisa ku pa djabièrnè 28 di aprel lo tin elekshon. KSE a reuní pa asina prepará e trayekto pa un elekshon nobo. KSE ta spera di tin klaridat tokante e trayekto, manera kalènder di voto, pa asina sa ki dia por kuminsá saka avisonan den korant, e proseso di inskripshon di partido i dunamentu di sosten na partidonan nobo. Pa dia 10 mart ta stipulá komo dia pa entregá lista i Römer ta spera ku pronto tin mas informashon tokante fechanan importante den kuadro di e elekshon, paso e tempu te ku 28 di aprel no ta hopi largu, pero si ta posibel pa organisá elekshonnan nobo. E situashon aktual ta komparabel ku esun na aña 2012 na momento ku gabinete Schotte no tabatin sosten mayoria mas den parlamento. Na e okashon ei a disidí na komienso di ougùstùs pa organisá un elekshon dia 19 di òktober. Resientemente Parlamento a deliberá tokante reglanan nobo relashoná ku inskripshon di partidonan, pero ainda e reglanan nobo no ta ofisial. Römer a splika ku pa e elekshon nan binidero lo keda apliká e reglanan aktual.