A ekstraditá Rietwijk, Koeiman i Felecia pa Merka.


Djárason mèrdia 15 di febrüari, a ekstraditá Ramphis “Ronchi” Rietwijk (nasé 1965), Rogelio “Greg” Koeiman (nasé 1968) i Gilbertico “Kalala” Felesia (nasé 1978) pa Estádos Unídos. Felecia i Rietwijk a sali for di Kòrsou i Koeiman a sali for di Sint Maarten riba un vuelo spesial di outoridatnan Merikano. E ekstradishon di Koeiman, Rietwijk i Felesia konosé un historial largu. E proseso a kuminsá na 2013, na momentu ku Estádos Unídos a pidi detenshon i ekstradishon di tur tres persona relashoná ku trafikashon di droga. Outoridatnan hudisial na Merka ta akusá e trio di trafikashon di por lo ménos 2 kargamentu for di Philipsburg pa Estádos Unídos. Na yüli 2013 US District Court for the Southern District of New York a ordená nan detenshon.

E proseso di ekstradishon a konosé un kaminda hopi largu. For di 2013 te ku e siman akí. Durante henter e proseso tabatin diferente kaso den Korte via Hof i via huisio sumario penal i sivil pa trata na para e proseso. Tur a resultá envano. Na dos okashon a trata e ekstradishon asta den Korte Supremo (Hoge Raad) di Reino Ulandes na Den Haag, ku ta e órgano ku último palabra riba tereno di lei penal den Reino. Promé biaha esei a sosedé riba petishon di abogado i despues riba petishon di Ministerio Públiko (OM). Dia 15 di novèmber 2016 Hoge Raad a disidí definitivamente ku e ekstradishon ta hustifiká i akseptabel. Dia 16 di yanüari 2017, Gobernadó di Kòrsou i Gobernadó di Sint Maarten a tuma e desishon definitivo pa konkretisá e ekstradishon.