Tenshon a eskalá entre Parlamentarionan (11) i gabinete demishonario Koeiman. (RESUMEN)


Durante un reunion èkstraordinario di Konseho di Minister djamars atardi, a surgi un situashon kaminda Promé Minister demishonario Hensley Koeiman a partisipá ku ta bai retirá e dos ministernan pa Pueblo Soberano, esta Minister Larmonie-Cicilia i Minister Jaime Cordoba. Den deklarashon na prensa, Minister Cordoba a splika ku no opstante e intenshon, ni Promé Minister, ni Konseho di Minister no tin base pa tuma e desishon ei. Ademas Segun Cordoba, tabata minister Suzanne Camelia-Römer a splika ku a tuma e desishon basá riba artikulo 29 di Areglo di Estado di Kòrsou. A hasi esaki pa medio di un “landsbesluit”.

E desishon di Konseho di Minister, ku ta demishonario, a pone ku e grupo di 11 ku tin mayoria den Parlamentu, a pidi pa yama un reunion di urgensia pa mes anochi. Nan a duna te ku 6or pa esaki sosodé. Den kaso ku esaki no sosodé, nan mes lo organisá e reunion. Kopia di invitashon pa reunion di urgensia di Parlamentu. (klek riba foto pa imagen grandi)

Algu pasá di shete, a start e reunion di urgensia den Parlamentu, presidí pa Gilmar ‘Pik’ Pisas komo e miembro mas bieu den Parlamentu i abogado Chester Peterson komo Grefi. E Parlamentarionan ku tabata presente ta Meindert ‘Menki’ Rojer, Amparo Dos Santos i Norberto Veira Ribeiro di partido Kòrsou di Nos Tur, Jacintha Constancia, Gerrit Schotte, Gilmar Pisas i Sharetti Eduarda-Francisca pa MFK, Edward Braam i Marylin Moses komo miembronan independiente i Melvin ‘Mac’ Cijntje i Sherwin Leonora di PS. Parlamentario Pisas a splika a base di kua artikulo, segun reglamentu di orden di Parlamentu, a organisá e reunion.

Durante e reunion a pasa varios moshon, entre otro pa baha Presidente i Vise Presidente di Parlamentu, ademas a pasa diferente moshon di deskonfiansa kontra tur e Ministernan den Gabinete Koeiman. Kopia di moshonnan aseptá den Parlamentu. (klek riba foto pa imagen grandi)

Mientras den Parlamentu tabata pasa e moshonnan, gabinete demishonario Koeiman a yama un konferensia di prensa di urgensia. Durante e rueda di prensa a bolbe enfatisá ku a Konseho di Minister a retirá Ministernan Cordoba i Larmonie-Cecilia, basá riba artikulo 29 den Konstitushon. Gabinete Koeiman a presentá ku kopia di nan desishon firmá pa Gobernadó Lucille George-Wout. Kopia di Landsbesluit pa pidi retiro di ministernan firmá pa Gobernadó. (klek riba foto pa imagen grandi)

Durante e rueda di prensa di Minister Suzanne Camelia-Römer, ku ta tambe un hurista, a splika ku e reunion ku e grupo di 11 Parlamentario a tene algu ratu promé ta ilegal, debí ku Presidente di Parlamentu, Giselle McWilliam a yama un reunion kaba pa djabièrnè awor, pa atendé e puntonan di agenda.

Mientras tantu riba petishon di e grupo di 11 Parlamentario, Gobernadó a invitá nan pa un reunion djarason mainta 9or na Palasio di Gobernadó. E situashon ta sigui hopi konfuso.