Schotte ta yama bonbiní na elekshon nobo.


Lider polítiko, Gerrit Schotte di MFK a deklará na TV Direct ku e ta yama bonbiní na un elekshon nobo. “Lo ta fantástiko si disolvé Staten. Pueblo ta haña e oportunidat pa kastigá e partido di Koeiman p’é traishon ku el a kometé. A propósito MAN nunka a deklará fo’i tempran ku unabes den gobièrnu, nan lo a bai traha ku PAR,” asina Schotte a deklará. Di akuerdo ku Schotte, e periodo despues di e resien elekshonnan tabata unu di krísis tra’i krísis, tantu paden komo pafó di partido MAN. “Promé tabata Pueblo Soberano ku a keda for di formashon, pa despues e partido por a drenta tòg. Despues a aserká Omayra Leeflang di Un Kòrsou Hustu, sin éksito,” Schotte a sigui deklará. Schotte a tipifiká Koeiman komo un lider ku no ta tuma desishon i ta schuif tur kos pa despues, dor di lanta un komishon pa kada problema. Debí na esaki, e partido lo keda kastigá den e elekshon ku ta bin, Schotte a bisa. Lider polítiko di PS, Jaime Córdoba, a bisa den un reakshon ku hopi kos a bai robes den koalishon. Córdoba a menshoná por ehèmpel, e suma di mas ku 5 mion florin ku a akordá pa e estudio pa polis riba nivel universitario pa kasá di Minister Camelia-Römer. Schotte a mustra tambe riba e problemanan rondó di e implementashon di e komishon di ‘smart zoning’. Minister Suzanne Camelia-Römer (PNP) di Tráfiko, Transporte i Planifikashon Urbano i su departamentu di VVRP, tabata kontra formashon di un komishon den Parlamentu pa atendé e proyekto. Entretantu ta ampliamente konosí ku debí na e punto aki, entre otronan, Parlamentario Cijntje i Leonora a kita nan sosten for di Gabinete Koeiman i dia 28 di aprel lo tin elekshon.