Ministerio Públiko ta haña rason i Norbert George mester rektifiká.


Deklarashon di e èks polítiko Norbert George, den sentido ku Ministerio Públiko lo ta paga tres periodista pa saka sierto informashon, pa asina influenshá opinion públiko, ta kontra kontra lei i kontra pais i e mester rektifiká su ponensianan. Asina korte a sentensiá. Na momentu di pisa su diktámen, wes a konsiderá e derecho di Ministerio Públiko pa protehá e bon nòmber di e instansia. Den e kaso aki, esei ta pisa mas tantu ku derecho di libertat di ekspreshon, segun korte.

Nobert George a hasi su deklarashon riba Facebook i mester rektifiká einan tambe. E teksto mester keda un siman largu riba su página di Facebook i na un manera bisto i e por ta solamente na papiamentu, ya komo ku e akusashon kontra Ministerio Públiko, tabata den e idioma ei. Hues a kuminsá skibi e teksto George : Riba 13 di sèptèmber 2016 durante un diskushon hibá riba e página di Facebook di Menki Rojer, mi a bisa ku Ministerio Públiko ta paga (sea periódikamente òf nò) tres periodista pa saka informashon afó i asina influenshá opinion públiko. Hues a duna veredikto ku esaki ta un akusashon basta serio, ku no tin sosten den e material real disponibel. Ku mi akusashon mi a kualifiká Ministerio Públiko komo un instansha sin integridat. Mi akusashon ta tacha e reputashon, kredibilidat i bon nòmber di Ministerio Públiko i ta mina e konfiansa den Ministerio Públiko. Pasó Ministerio Públiko ta un órgano di gobièrnu, mi akusashon ta mishi tambe ku e bon nòmber di Pais. A ordená mi pa laga e rektifikashon aki riba mi página di Facebook. Hues a prohibí mi pa duna komentario riba e rektifikashon aki.

Si Nobert George no kumpli ku e sentensia, e mester paga 250 florin pa dia te un máksimo di 2500 florin.