Segun Minister Camelia-Römer e diferente rumornan ku ta sirkulá via di medionan sosial tokante Outoridat di Aviashon Sivil Kòrsou (CCAA), no ta kuadra ku bèrdat. Den un mensahe ku a bai rònt via medionan sosial tin inspektornan di CCAA ku lo ta riba ‘payroll’ di Insel Air. Ademas e mensahe ta papia tambe ku e inspektornan tabatin un kompanianan ku tabata bende Insel Air piesa.
Debí na e rumornan Minister Camelia-Römer a tuma un desishon pa pone e dos inspektor/ámtenarnan di CCAA riba 'non-actief' pa un periodo di dos luna. E inspektornan a haña 'toegangsontzegging', ku ta enserá ku nan no por drenta ofisina di CCAA. Mesora Minister Camelia-Römer a duna e kompania Forensic Caribbean e tarea pa hasi un investigashon amplio. Nan lo investigá si tin trabounan ku un òf mas ámtenar di CCAA a hasi ku ta kontra di e 'Landsverordening Materieel Ambtenarenrecht' (LMA) i reglanan di bon gobernashon. Tambe lo wak si tin relashon di trabou ku Insel Air òf otro áreanan di aviashon ku no ta permití. Ta kalkulá ku e investigashon ta dura masomenos un luna.
Entretantu CCAA a manda otro inspektornan riba tereno di aeropuerto pa kontrolá diferente aspekto di Insel Air.