E leyenda di músika Jazz, Al Jarreau a fayesé na edat di 76 aña.


Siman pasá a sali den notisia ku e legendario kantante di jazz, Al Jarreau lo a baha ku penshun debí na problemanan ku salú. E kantante mester a drenta hòspital na Los Angeles i djadumingu den kurso di dia su representante a bisa medionan di komunikashon ku Jarreau a fayesé. Al Jarreau tabatin mas ku 50 aña ta kanta i el a gana 7 Grammy Awards. E tabata e úniko kantante ku a gana e premio di e kategorianan di jazz, r&b i pop. Jarreau tabata konosí komo un “scatsinger”, esta un kantante ku por a imitá vários instrumènt ku su bos.

Jarreau a nase na 1940 na Wisconsin i despues el a bai skol sekundario na San Fransisco. Huntu Goerge Duke el e forma su promé trio. Tabata durante un kompetensia pa buska talento nobo, ku e kompania Warner Brothers a organisá, ku atenshon a kai riba Jarreau. Mesora nan a ofresé un kòntrakt i na 1975 el a saka su promé album titulá ‘We Got By’. Den un mensahe postumo Al Jarreau a hasi un yamamentu na hubentut : “Buska algu artistiko ku bo por hasi ku pashon i hasi’é. Ku arte den bo bida, lo bo ta un mihó miembro den bo famia, un mihó bisiña den bo bisindario, un mihó amigu i un mihó suidadano”.

Aña pasá Al Jarreau tabata na Kòrsou durante Curaçao North Sea Jazz pa su presentashon den Landhuis Brakkeput Mei Mei.