Rusia ke ekstraditá Snowden, komo regalo pa Trump.


Gobièrnu ruso ta hunga ku e idea pa ekstraditá Edward Snowden pa Merka. Snowden ta e batidó di kampana i anterior kolaboradó di inteligensia merikano. Rusia lo ke hasi esaki komo un akshon pa faboresé presidente Donald Trump. Asina fuentenan den servisionan di inteligensia merikano a bisa NBC News. E fuentenan ta basa nan mes, riba un seri di rapòrt di inteligensia, den kua tin informashon hopi sensibel, tokante plannan di Rusia, pa por kai na agrado serka e presidente merikano.

Na vários okashon Trump a laga sa ku e ke pa laga husga Snowden , ku ta biba komo desterado na Rusia. Na yüli 2015 tempu Trump tabata kandidato presidensial pa e republikanonan, el a bisa CNN : "Mi ta haña Snowden un traidor i lo mi ke atendé severo kuné. I ora mi ta presidente, Poetin lo entreg’é.” Snowden mes, di kual su pèrmit di estadia ruso, resientemente a keda alargá te 2020, ta mira e notisia hustamente, komo prueba ku nunka el a traha pa e rusonan. “Porfin tin prueba irefutabel, ku nunka mi a kolaborá ku servisio di inteligensia ruso. Niun pais no ta entregá un spion,” asina Snowden a bisa via su kuenta di Twitter.

Ben Wizner ku abogado di Edward Snowden a bisa NBC ku e no sa di nada di un posibel ekstradishon. Di otro banda gobièrnu ruso ta bisa ku esaki ta ridikules. Snowden, ku tabata traha komo kolaboradó di servisio di inteligensia NSA. Na 2013 el a lèk dokumentunan relashoná práktikanan di spionahe merikano. El a relatá na varios periodista di forma detayá, kon NSA tabata investigá tantu siudadanonan merikano komo otro personanan via internèt. Asina el a bira konosí komo profundo di lei merikano. Hustisia merikano ke husga Snowden, debí ku el a lèk e informashonnan. Na Merka tin un kastigu di prizòn di por lo ménos 30 aña pa lèkmentu di informashonnan sekreto di estado.