Konseho Supremo Elektoral a risibí di únikamente dos partido polítiko, e lista ku donashonnan ku nan a risibí aña pasá pa kampaña. Asina presidente di KSE Raymond “Pacheco” Römer a konfirmá. Tur e 21 partidonan ku a inskribí pa partisipá na elekshon a haña un notifikashon kaba, pa mustra nan riba nan deber pa ku lei. Sigun e lei Landsverordening financiën politieke groeperingen, tur partido polítiko mester entrega na KSE, kopia di un deklarashon firmá ku registrashon di nan entradanan durante e aña anterior. Esaki mester a tuma lugá promé ku dia 1 febrüari. Te ku fin di siman pasá a risibí solamente dos reakshon segun Römer. E no ta ekskluí ku den e próksimo dianan mas partido lo kumpli ku nan obligashonnan. Römer a pone énfasis ku partidonan ku no a pasa e ròndu di firmamentu di lista tambe mester entrega e informashonnan akí. Dia 5 di òktober di aña pasa 13 partido a partisipá na elekshon, esta PS, MFK, PAIS, PAR, PNP, MAN, KdnT, Hustu, PAS, MP, MKP, DP i Pro Kòrsou. Partidonan ku a partisipá na e sosten di lista pero no a logra optené e kantidat di firmanan rekerí tabata FOL, PRIK, 1 Tim Magno, PAN, R’16, GOOL, FE/PKP i UPN. Segun Römer KSE lo no ta hopi strikto ku e fecha di 1 febrüari. Loke ta importante ta ku partidonan mester tene nan mes na lei.