Senado merikano ta vota pa Minister di Enseñansa.


Senado merikano a aprobá nombramentu di e bionario Betsy DeVos komo minister di Enseñansa. Mike Pence visepresidente di Merka a depositá e voto desisivo. Segun empleadonan di Senado no a yega di sosodé promé ku un visepresidente mester a uza su voto pa kibra un impase pa nombra un miembro di gabinete. E Senado merikano tabata partí den eksaktamente dos mitar, debí ku dos senador Republikano a uni nan mes na e 46 senadornan Demókrata i dos oponente independiente. Segun oponentenan, DeVos no tin sufisiente eksperensia ku enseñansa. Segun e Republikanonan esaki hustamente tin benefisio, komo ku e no ta un burókrata den enseñansa. Promé ku votashon, e senador Republikano Lamar Alexander a yama DeVos e kandidato mas kontroversial pa bira minister di enseñansa, debí na su falta di eksperensia. E oudishonnan ku a tuma lugá promé ku nombramentu di DeVos, no tabata na su fabor pa motibu di sierto remarke ku el a hasi. Elisabeth ‘Betsy’ DeVos ta kasa di Dick DeVos, ku su tata Richard Sr. ta kofundadó di e kompania di merkadeo Amway. Betsy DeVos a okupá diferente funshoná den partido republikano. DeVos ta konosí partikularmente pa su trabounan karikativo.