Presidente Trump ketu bai bou di preshon hudisial i atake di su krítikonan.


Gigantenan di Silicon Valley manera entre otro Apple, Facebook, Google, Microsoft i Twitter, na total kasi un sentenar di empresa, a presentá un dokumentu legal serka Tribunal Federal di Apelashon, komo sosten na un demanda ku ta andando kontra e dekreto di Donald Trump. Según un sondeo ku CNN a hasi na fin di yanüari, 53% di merikano ta kontra e dekreto pa limitá inmigrashon. Segun otro sondeo di CBS, 51% ta rechasá e dekreto. E deishon di Trump a provoká hopi protesta tantu na merka mes, komo den eksterior na entre otro London i Hong Kong. Segun Trump : "Tur e sondeonan ei ta negativo, nan ta notisia falsu, méskos ku e sondeonan elektoral di e kadenanan CNN, ABC i NBC," asina el a bisa via Twitter.

"Ta duel mi. E hendenan ke seguridat na frontera i kòntròl rigoroso,” asina Trump a bisa via Twitter. Donald Trump, a sigui desafiante den su defensa di e dekreto anti-migratorio. E presidente republikano a prohibí entrada na Merka, pa siudadanonan di Iran, Irak, Libia, Somalia, Sudan, Siria i Yemen i a suspendé e yegada di refugiadonan, loke rápidamente a krea e protestanan na Merka i den eksterior. Despues ku un hues federal den korte di Apelashon a ordená gobièrnu pa presentá un defensa pa e dekreto. Blokeo di e dekreto a bolbe habri porta pa refugiado i siudadanonan di e shete paisnan i asina a frusta temporalmente e plan di Trump, ku awor tin ku enfrentá tambe oposishon di e prinsipal kompanianan teknológiko. Visepresidente Mike Pence a denunsiá e desishon di tribunal komo frustrante. Figuranan altu republikano tambe ta inkomodo ku e presidente nobo. E líder di e mayoría den Senado, Mitch McConnell a hasi un yamada na Trump pa e evitá di kritiká huesnan individualmente.