
Un delegashon di Kòrsou enkabesá pa minister di ekonomia Eugène Rhuggenaath a bishita Repúblika Dominikana pa buska fruta, bèrdura i piská, pa den kaso ku e merkado venezolano kai afó. Entre Kòrsou i Venezuela tin lasonan tradishonal riba tereno komersial, pero debí na e krísis polítiko i ekonómiko na Venezuela, for di aña pasa tin un prohibishon pa barkunan bin Kòrsou ku produkto. E ministernan di Kòrsou i Repúblika Dominikana a reuní i akordá pa forma un komishon bilateral pa por probechá di e potensial entre e dos paisnan pa loke ta desaroyo komersial, prinsipalmente pa loke ta trata eksportashon di produktonan agríkola di Repúblika Dominikana pa Kòrsou. Durante e bishita e delegashon tabatin diferente reunion i a bishita e área di zona liber pa mira desaroyo den e sektor importante akí pa ekonomia dominikano. E minister dominikano a komprometé na lanta un komishon ku representantenan di e ministerio di agrikultura, e sentro di eksportashon i invershon, e Konseho di Zona Liber i empresanan lokal den e sektor pa asina oumentá eksportashonnan di produktonan dominikano pa Kòrsou. Durante e enkuentro a ta tei e ministernan di Kòrsou i Repúblika Dominikana, kònsùl di Repúblika Dominikana na Kòrsou, direktor di Curinde, promé sekretario di embahada di reino i direktor ehekutivo di e konseho nashonal di zona liber di Repúblika Dominikana.