Di tres asesinato pa 2017 na Kòrsou.


Den fin di siman tras di lomba a registrá e di tres asesinato pa 2017. E krímen a tuma lugá masomenos mitar di kuater, djadumingu atardi, ora Sentral di Polis a risibí yamada pa un kaso di tiramentu ku a tuma lugá den un kas den Penstraat. Na yegada a topa un hòmber drumí den un kamber di e kas ku diferente herida di bala na su kurpa. Ambulans no por a hasi nada mas pa e víktima i dòkter di polis a konstatá morto di e hòmber Gerald Hilario Nicolina, mihó konosí komo Chado, nase na Kòrsou dia 13 di yanüari 1977. For di investigashon preliminar ku polis a hasi, a sali na kla ku dos hòmber a yega na e kas den un outo i drenta e kas. Paden a pone arma di kandela na kabes di un habitante, mientrs e otro sospechoso a bai den e kamber kaminda e víktima tabata i a los tirunan dirigí riba dje ku konsekuensia fatal. Despues di e krímen, e dos asesinonan a bai for di e sitio den un outo ku despues a bin haña kimá. Investigashon den e kaso ta kontinuá.