Amazon a kuminsá ku tèst entregá di paki ku drone. E promé paki a keda entregá den un kunuku serka di Cambridge na Inglatera. Einan e pèrsonan ku a partisipá na e tèst por a bestèl produktonan ku ta keda entregá for di un sentro di distribushon den serkania. Empleadonan di Amazon ta paketá e pedido via mashin. Despues e paki ta keda di skùif outomátikamente bou di un drone i e drone ta bai pafó via un riel. Djeinan e drone ta bula riba su mes pa su destinashon. E drone ta baha i laga e paki lòs, pa despues bula bai bèk na e sentro di distribushon. E dronenan a keda diseñá pa hiba e pedido di klientenan den di 30 minüt òf ménos.
Den e promé fase dos kliente di Amazon a partisipá na e tèst. Lo ekspandé e kantidat den futuro. Pakinan ku e drone por entregá, por pisa mas o ménos 2.20 kilo. Den yüli Amazon a haña pèrmit di outoridatnan den Reino Uní pa por tèst e dronenan. E drone ku nan a usá ta un prototipo ku a keda lansá na novèmber 2015. E tienda di wep merikano a anunsiá su proyekto di drone for di 2013 bou di e nòmber Prime Air. Pa motibu di reglanan severo di outoridatnan di aviashon merikano, e negoshi a muda parsialmente pa Canada i ta hasi tèst na Reino Uní.