Merka a anunsiá ofisialmente sanshonnan kontra Iran.


Estadonan Uní di Merka ta bin ku sanshonnan kontra 13 persona i 12 entidat. Asina Kas Blanku a informá. E pais ta tuma e medidanan debí na e pruebanan ku Iran a efektuá ku un misil di distansha medianolargu i loke Merka ta konsiderá komo aktividatnan destablisadó den e region. Riba e wèpsait di kas Blanku a pone un lista ku esnan sanshoná. Ta trata di entre otro personanan i entidatnan ku ta stablesé na Emiratonan Arabir Uní, Libanon i China.

Anteriormente Kas Blanku a laga sa kaba ku Iran ta bou di opservashon skèrpi, komo konsekuensha di e prueba. E lansamentu, segun e merikanonan ta kontra di e resolushon di Konseho di Seguridat di Nashonnan Uní, ku ta prohibí Iran pa hasi prueba ku misilnan ku ta karga armanan nuklear. E minister di Asunutunan di Eksterior, Sigmar Gabriel, a yama e prueba ku misil un violashon masha kla di e resolushon di Nashonnan Uní. Un fuente anónimo ku ta involví den e plan, a anunsiá ku e sanshonnan tabata pendiente kaba, promé ku Donald Trump.

Trump a bisa ku Merka no ta ekskluí nada. Esaki tabata su kontesta, ora a puntr’é si e lo konsiderá akshonnan militar komo reakshon riba e lansamentu. El a añadí via su kuenta di Twitter ku Iran ta hunga ku kandela. Trump a skibi ku Iran no a apresiá kon amabel presidente Obama tabata i ku e mes lo ta ménos amabel. Den un reakshon, Iran ta afirmá ku nunka nan lo pone nan ehérsito ni arma kontra otro país, a ménos ku esaki resultá nesesario komo defensa propio. Asina e minister di Asuntunan Eksterior di Iran, Mohammad Javad Zarif a reakshoná via Twitter.

Iran ta un di e shete paisnan kontra kua Trump a imponé un prohibishon pa por drenta Merka.