E porsentahe di desempleo na Kòrsou a subi den un aña ku 1,6%. Asina Centraal Bureau voor de Statistiek (CBS), a publiká. CBS a tene un investigashon di forsa laboral. (Arbeidskrachtenonderzoek - AKO)
Durante lunanan di e investigashon, e porsentahe di desempleo tabata 13.3 %. Na 2015, den e mésun temporada, e porsentahe tabata 11.7%. E investigashon aki (AKO) ta un investigashon aleatorio (steekproefonderzoek) doméstiko, ku CBS ta hasi ku e meta pa midi último desaroyonan riba merkado. Esaki ta enserá desaroyo den e porsentahe di desempleo, e partisipashon den trabou, e kantidat den pueblo ku tin empleo i e kantidat di hendenan ku ta buskando trabou. For di e sondeo, a sali afó ku e kantidat bou di poblashon ku ta buskando trabou a subi ku 1.755 i alkansá un total di 9.953 persona den 2016. Esaki ta 21.4% mas ku den 2015. Na 2015, e kantidat tabata 8.198 persona. E kantidat di hende ku tin trabou a subi ku masomenos 3.300 persona. Esaki ta un oumento di 5.3%, kompará ku aña 2015. E kantidat total di hende ku un trabou na Kòrsou, na sèptèmber/òktober 2016, tabata 65.100 persona. Finalmente e partisipashon den labor for di 15 aña i mas ta 59.0%.