Gobièrnu di Kòrsou a yega un akuerdo ku InselAir pa fia e kompania un suma di 33 mion florin pa paga bèk ku interes den 5 aña. E fiansa ta pa salbaguardiá eksistensia di InselAir i pa garantisá konektividat aéreo pa i for di Kòrsou. E fiansa ta mará na kondishonnan pa ku maneho di e fiansa den e kompania i tambe pa stabilisá e kompania. A palabrá ku tur plaka ku bini for di Venezuela lo bai pa gobièrnu. Venezuela tin un debe na InselAir di mas o ménos 100 mion dòler. E echo akí a hinka InselAir den problema finansiero. Ku e fiansa di gobièrnu InselAir ta finansieramente i operashonalmente fuerte bek. Pa gobièrnu ta importante ku aksesibilidat i konektividat di Kòrsou ta garantisá di un forma sigur. Ekonomia, generashon di devisa i empleo na Kòrsou tambe ta importante den esaki. Komo seguransa riba e fiansa gobièrnu a haña derechi riba propiedat (pandrecht) i usofrukto (vruchtgebruik) di 51% di akshonnan di e kompanianan ku ta forma parti di InselAir. Ku esaki gobièrnu ta haña tur e derechinan di un akshonista regular sin bira doño di e kompania.