Outoridatnan a intensifiká kòntròl riba InselAir.


Den fin di siman outoridatnan lokal di aviashon a kuminsa ku kontròl i supervishon adishonal riba operashon general di InselAir. E promé kòntròl ta tuma lugá riba e departamentu di mantenshon di InselAir. Outoridatnan ke sa kon e maneho di mantenshon ta funshoná bou di e direktor, Ivo Oduber. E desishon ta debí ku a determiná ku e planifikashon di mantenshon ta den mal estado. Den e dianan ku a pasa, outoridatnan a prohibí buelo, te ku próksimo aviso, di sigur kuater avion di InselAir na Aruba.

Awor ta keda na gerensia pa mustra si e direktor di mantenshon ta kumpli ku loke lei ta stipulá, esta pa e flota di avionnan ta na òrdu. Minister di Desaroyo Ekonómiko, Eugene Rhuggenaath a pone kondishonnan i garantía severo i krítiko pa un fiansa total di 33 mion florin pa InselAir.

Riba e mésun fecha ku a prohibí buelo di e avionnan na Aruba, a firma tambe un akuerdo entre gobièrnu i InselAir. Èks-minister di Finansa, José Jardim, ta bai fungí komo presidènte komisario. Di e demas komisarionan, a keda repartí entre dos ku ta skohí dor di InselAir i dos dor di gobièrnu. Pa InselAir, Henry van der Kwast, pa gobièrnu Lars Brabander i Anton Casperson lo fungi komo komisario. Aparte di e dos komisarionan, gobièrnu a nombra un tim di maneho den persona di André Delger komo Chief Financial Officer (CFO) i Gilles Filiatreault di Canada, komo direktor ehekutivo ku lo guía e kompania InselAir, huntu ku e tim. E plan pa stabilisá e kompania lo konkluí fin di febrüari 2017. Den e plan lo mester bini, kon mas lihé posibel por normalisá e situashon di e kompania.

Den tres luna e tim di maneho lo mester traha un plan komersial, ku e hunta di komisarionan mester aprobá. Den e plan komersial mester deskribí un plan di tres aña, ku metanan stratégiko, operashonal i finansiero. Huntu ku esaki, mester buska un sosio stratégiko. Ta e intenshon pa selekshon di e sosio stratéiko tuma lugá den e último parti di 2017, na e momentu ku gobièrnu hala atras.