Quincy Jones ta kuminsá kaso kontra famia di Michael Jackson.

Quincy Jones ta bai kuminsá un kaso pa e derechonan riba müzik di Michael Jackson. E pleitu entre e produktor Quincy Jones, e herederonan di Michael Jackson i e kompania diskero Sony Music Entertainment lo sigui den korte. Segun The Hollywood Reporter, dia 21 di febrüari e kaso ta bai dilanti.

E asuntu ta trata e ‘royalty’s’ ku Jones ke pa e piesanan di Jackson ku a sali despues di su morto. Entre otro relashoná ku müzik di sine This is It i e reedishon di Bad.

Segun e produktor e piesanan di Jackson a keda adaptá di nobo intenshonalmente pa asina e no mester wòrdu pagá.

Jones i e herederonan di Jackson tin un par di aña kaba ta diskutí riba e asuntu. Anteriormente Jones, ku ta responsabel pa hopi álbum eksitoso di Michael Jackson, a eksigí 10 mion dòler pa kompensashonnan (royalty’s) ku e no a risibí. E produktor a traha kasi 35 aña huntu ku e “King of Pop” i nan a produsí álbumnan hopi eksitoso manera Thriller i Off the Wall.