E pelíkula La La Land ta nominá pa 14 Oscar. E pelíkula, protagonisá pa Ryan Gosling i Emma Stone, di e forma ei tin un kantidat rèkert di nominashon pa e prestigioso premio. E pelíkula musikal tin mes tantu nominashon ku Titanic (1997) i All About Eve (1950). E pelíkula ta nominá entre otro pa kategorianan di Mihó pelíkula, Mihó Aktris den ròl Protagoniko i mihó Aktor den ròl Protagóniko. Tambe La La Land ta den kontienda pa un Oscar pa Mihó Músika i Mihó Produkshon pa Damien Chazelle. Ryan Gosling ta kompartí e nominashon pa mihó Aktor den ròl Protagoniko ku Andrew Garfield (Hacksaw Ridge), Casey Affleck (Manchester by the Sea), Viggo Mortensen (Captain Fantastic) i Denzel Washington (Fences ). Banda di Emma Stone otro nominadonan pa Mihó Aktris den ròl Protagoniko ta Isabelle Huppert (Elle), Natalie Portman (Jackie), Ruth Negga (Loving) i Meryl Streep (Florence Foster Jenkins). Despues di La La Land, Moonlight i Arrival ta e pelíkulanan ku mas nominashon, ámbos ku 8. Hacksaw Ridge i Lion tambe ta nominadonan grandi ku kada unu 6 nominashon. Huntu ku La La Land, e nominadonan pa mihó pelíkula ta Arrival, Fences, Hacksaw Ridge, Hell or High Water, Hidden Figures, Lion, Manchester by the Sea i Moonlight. Aktornan Jeff Bridges (Hell or High Water), Lucas Hedges (Manchester by the Sea) i Dev Patel (Lion) ta nominá pa Mihó Aktor di Reparto. Den e kategoria Mihó Aktris di Reparto ta nominá Viola Davis (Fences), Naomie Harris (Moonlight), Octavia Spencer (Hidden Figures) i Nicole Kidman (Lion).