Na Sèptèmber 2016 Norbert George a hasi un ekspreshon via retnan sosial ku tin algun periodista ku ta riba “payroll” di Ministerio Públiko. El a akusá e instansia di ta kulpabel na soborno na tres periodista, di kual dos a keda menshoná na nòmber. Nan lo a sali for di Ministerio Públiko ku un ènvelòp ku plaka aden. Den novèmber e la hasi menshon di e periodista Yves Cooper. Ministerio Públiko a aserka Norbert George pa e rektifiká esaki pero George no a duna oido na e petishon. Esaki a resultá den un huisio sumario kontra George. Djaluna a trata e kaso i abogado di Ministerio Públiko mr. van den Heuvel a hiba e defensa i yega na su punto, esta ku mester bin rektifikashon di banda di George. Mr. van der Heuvel a enfatisá ku e kaso no tin di aber ku kita libertat di hende, pues no ta un kaso penal, pero un kaso sivil. E la bisa ku George tin ku proba e alegashonnan ku e la trese dilanti. Norbert George a presentá sin abogado i a defendé su mes. George a hiba un defensa ampliamente motivá pa mustra ku loke el a bisa ta kosnan ku Yves mes a konté den un kombersashon ku entre otro un Haakmat i Lucio ku sa ta hopi biaha huntu pa un proyekto ku nan mester a traha ariba. George a pleita pa deklará Ministerio Públiko no atmisibel pa motibu ku loke el a menshoná riba Facebook no ta dirigí riba Ministerio Públiko pero riba e periodistanan en kuestion. Na final di tratamentu di e kaso, George a keda para riba su punto. Wes lo duna su veredikto 13 di febrüari próksimo.