Gran parti di Duana di Kòrsou ta será djaweps awor.


Djaweps 26 di yanüari ta Dia Internashonal di Duana i pa e okashon akí duana na diferente pais, pa medio di un dekreto gubernamental i te kaminda trabou ta permití, lo tin un dia liber. Riba e dia duana no por duna e servisio usual di atendé importashon, eksportashon i servisio di tránsito di karga. Sierto partinan di duana lo duna servisio limitá na kliente. Ta supliká usuarionan di servisio di Duana pa tuma bon nota di e kambio temporal aki.

Na e islanan ku ántes tabata Antia Hulandes ta un tradishon pa organisá Siman di Duana ku diferente aktividat. Tur aña esaki ta tuma lugá riba un otro isla. E aña aki e selebrashon ta tuma lugá na Boneiru. Tin un parti ofisial, un parti di reflekshon riba e funshon importante di un duanero pa su pais i tambe aktividatnan deportivo i sosial. Tambe lo interkambiá eksperensianan personal i di e organisashon entre koleganan di kada isla.

Duana na Nieuwehaven lo ta será pa públiko. Solamente e parti di waf di kònteiner lo ta habrí pa tráfiko di kònteiner. Duana na Aeropuerto lo sigui duna servisio na biaheronan. E parti di Swissport, esta karga via avion, lo ta será. Lo duna servisio solamente na e parti di eksportashon di Swissport. E parti di Curinde na Zona Liber tambe lo ta será. Duana na Punda lo ta será pero a adaptá e orarionan di trabou e siman aki pa asina por sigui brinda servisio di Vigilansia i Marítimo. Pa loke ta duana na Pòstkantor, a akordá ku lo no duna servisio djaweps. Duana Kòrsou ta supliká tur kliente, deklarante, personanan ku a importá produkto i biaheronan pa tene kuenta ku e kambionan. Ta bon pa tene kuenta ku lo no por deklará ningun karga riba djaweps 26 di yanüari. Duana lo informá tur su klientenan tambe via mail i via su sistema outomatisá di karga Asycuda. Pa loke ta servisio na kliente esei ta nifiká ku gran parti lo ta será. Kaminda trabou no ta pèrmití lo tin algun adaptashon na e diferente pòstnan di Duana. Pa evitá ku klientenan ta haña nan ku sorpresa ta spesifiká aki bou e situashon di kada pòst.