E organisashon di Miss Universo a bolbe duna Steve Harvey un chèns komo maestro di seremonia. No opstante e barku ku el a pega durante e edishon anterior, e kómiko i presentadó di 59 aña, tin mag di presentá e elekshon di Miss Universo 2016.
Na yanüari aña pasá Harvey a anunsiá Miss Colombia komo ganadó di e sertámen di beyesa. Miss Colombia a haña flor i hasta e korona riba su kabes promé ku e presentadó a rektifiká e anunsio. El a interumpí e selebrashon i splika : “Mi mester pidi diskulpa. Ta e di dos lugá ta pa Colombia.” E or’ei Miss Filipina a keda koroná komo Miss Universo. “Mi ta asumí mi responsabilidat. Tabata mi fout, un fout teribel,” asina Harvey a bisa e públiko. E kómiko a revelá despues di e suseso el a hasta keda menasá ku morto. “Tabata kuater minüt di un berdadero fièrnu,” el a bisa den un di su popular programanan di televishon.
Riba 29 di yanüari awor Harvey ta haña e oportunidat pa e biaha akí sí anunsiá e ganadó korekto. E elekshon ta tuma lugá e aña akí na Filipina.