Profesor Gilbert Cijntje di Inter Continental University of the Caribbean (ICUC) a konfirmá ku a entrega un kaso kontra Carl Camelia pa uso di un nòmber similar na esun di e instituto di enseñansa. For di desèmber abogado di ICUC a entrega un petishon pa un kaso kontra Camelia i ta warda awor un fecha di korte pa tratamentu di e kaso. E universidat di Camelia yama ICUC International (ICUC Int’l) i esei ta trese konfushon grandi pa motibu di e similaridat den nòmbernan. E universidat di Camelia tabata den media debí ku nan lo ta esun ku lo ofresé e estudio “Bachelor in Policing”, ku ta un estudio avansá pa polis. Den pasado a splika ku a konstituí ICUC Int’l despues ku a laga Büró pa Propiedat Intelektual di Kòrsou investigá si tin algun persona of instituto ku tin derechi riba e nòmber. Basá riba un resultado negativo di e investigashon aki, a registrá e nòmber. Segun Camelia, e universidat ta ofresé 24 tipo di estudio rekonosé ofisialmente. Tin un Dekreto Ministerial pa e estudionan na nivel Bachelor i un Dekreto Nashonal pa esnan na nivel Master i Dòktorando.